# আতংকৰ নাম ইব’লা
# কংগো-উগাণ্ডাত ছানিছে ইব’লাই
# আক্ৰান্ত হৈছে শ শ লোক, অজস্ৰ লোকৰ প্ৰাণহানি

ইব’লাৰ বাবেই স্থগিত ৰাখিবলৈ বাধ্য হ’ল ভাৰত-আফ্ৰিকা ফ’ৰামৰ চতুৰ্থ শীৰ্ষ সন্মিলন। চলিত মাহৰ শেষৰ ফালে অনুষ্ঠিত হোৱাৰ কথা আছিল ভাৰত-আফ্ৰিকা ফ’ৰামৰ শীৰ্ষ সন্মিলন।

বিপজ্জনক ইব’লা ভাইৰাছৰ কবলত পৰিছে আফ্ৰিকা।ক্ৰমশঃ ইয়াৰ প্ৰাদুৰ্ভাৱ বৃদ্ধি পাইছে।স্বাভাবিকতেই ইয়াৰ ক্ষতিশংকা বিয়পিছে বিশ্বৰ বিভিন্ন প্ৰান্তলৈ।এই পৰিপ্ৰেক্ষিতত চলিত মাহৰ ২৮ মে’ৰ পৰা ৩১ মে’লৈ হ’ব লগা ভাৰত-আফ্ৰিকা ফ’ৰামৰ শীৰ্ষ সন্মিলন স্থগিত ৰখা হৈছে।
এই সন্মিলনত আফ্ৰিকাৰ বিভিন্ন দেশৰ প্ৰায় ৫৪ জন প্ৰতিনিধিয়ে অংশগ্ৰহণ কৰাৰ কথা আছিল। কিন্তু জনস্বাস্থ্যজনিত সাম্ভাব্য বিপদৰ পৰা হাত সাৰিবলৈ আফ্ৰিকান ইউনিয়ন আৰু ভাৰতীয় প্ৰশাসনৰ মাজত হোৱা আলোচনা মৰ্মে ইয়াক পিছুৱাই দিয়াৰ সিদ্ধান্ত লোৱা হৈছে।

উল্লেখ্য যে, এই পৰ্যন্ত কংগো আৰু উগাণ্ডাত শিপাইছে ইব’লাৰ সংক্ৰমণ।ইতিমধ্যে আফ্ৰিকাৰ এই দেশদুখনত শ শ লোক আক্ৰান্ত হৈছে আৰু প্ৰাণ হেৰুৱাইছে অসংখ্যজনে।স্বাভাবিকতেই সমগ্ৰ পৰিস্থিতি অধ্যয়নৰ অন্তত বিশ্ব স্বাস্থ্য সংস্থাই ইয়াক ‘আন্তঃৰাষ্ট্ৰীয় জনস্বাস্থ্যজনিত জৰুৰীকালীন অৱস্থা’ হিচাপে অভিহিত কৰিছে।

বিশ্ব স্বাস্থ্য সংস্থাই আগবঢ়োৱা এই সমীক্ষাৰ বাবেই প্ৰস্তাৱিত ভাৰত-আফ্ৰিকা ফ’ৰামৰ শীৰ্ষ সন্মিলন স্থগিত ৰখাৰ গত্যন্তৰ নোহোৱা হ’ল। পৰৱৰ্তী সময়ত দুয়োপক্ষৰ মাজত হোৱা পাৰস্পৰিক আলোচনা মৰ্মে নতুন দিন-বাৰ থিৰাং কৰা হ’ব বুলি কোৱা হৈছে।

প্ৰসংগক্ৰমে উল্লেখ কৰিব পাৰি যে, আফ্ৰিকান দেশ কংগো দুবাৰকৈ ইব’লা ভাইৰাছৰ দ্বাৰা আক্ৰান্ত হৈছে। প্ৰথমে ২০১৮ চনত, তাৰ পিছত ২০২০ চনত। এই দুটা পৰ্যায়ত কংগোত কমেও ৩ হাজাৰ লোক মৃত্যুমুখত পৰে। তদুপৰি এই সময়ছোৱাত সমগ্ৰ দেশখনত আৰু কমেও ২০০০ লোকৰ মৃত্যু হয়।

মাৰাত্মক এই ভাইৰাছক বিশ্বৰ অন্যতম বিপজ্জনক ভাইৰাছ বুলি গণ্য কৰা হয়। ইব’লাত আক্ৰান্ত ৯০ শতাংশ লোকৰ মৃত্যু হয়। এই ৰোগৰ প্ৰাথমিক লক্ষণসমূহ হ’ল ডায়েৰিয়া আৰু ৰক্তক্ষৰণ।

১৯৬৭ চনত প্ৰথমবাৰৰ বাবে পূব আফ্ৰিকাত এই ভাইৰাছৰ আবিৰ্ভাৱ হৈছিল আৰু বহু লোকৰ প্ৰাণহানি হৈছিল। পৰৱৰ্তী সময়ত পশ্চিম আফ্ৰিকা আৰু মধ্য আফ্ৰিকাত পুনৰ এই ভাইৰাছৰ সন্ধান ওলায়। আজিও আতংকৰ এক নাম ইব’লা।