দেশৰ ৰাজনীতিৰ বাবে ডাঙৰ খবৰ। তৃণমূল কংগ্ৰেছৰ ২০ গৰাকী বিসম্বাদী সাংসদে নেশ্যনেলিষ্ট চিটিজেন্স পাৰ্টীত চামিল হোৱাৰ বৃহৎ সিদ্ধান্ত গ্ৰহণ কৰিছে। লোকসভাৰ অধ্যক্ষ ওম বিৰলাৰ সৈতে ঘণ্টাজোৰা চলা বৈঠকৰ অন্তত এই ঘোষণা কৰে তৃণমূলৰ সাংসদ কাকলি ঘোষ দস্তীদাৰে।
দেওবাৰে ওম বিৰলাক সাক্ষাতৰ পিছত সাংসদ কাকলি ঘোষে কয়, ‘লোকসভাৰ ২০জন বিদ্ৰোহী TMC সাংসদে নেশ্যনেলিষ্ট চিটিজেন্স পাৰ্টীত চামিল হম। আমি শাসকীয় এনডিএ মিত্ৰজোঁটৰ প্ৰতি সমৰ্থন আগবঢ়াম। আমাৰ বাবে লোকসভাত পৃথকে বহাৰ ব্যৱস্থা কৰি দিবলৈও অধ্যক্ষ ওম বিৰলাক অনুৰোধ জনাইছো।’
কাকলি ঘোষৰ উপৰিও TMCৰ আন এজন বিদ্ৰোহী সাংসদ সুদীপ বন্দোপাধ্যায়ে তৃণমূলৰ নাম সন্দৰ্ভত তেওঁৰ দলটোৱে আইনৰ সহায় ল’ব বুলি ইংগিত দিছে। তেওঁ কয়, ‘আমি নেশ্যনেলিষ্ট চিটিজেন্স পাৰ্টীত যোগদান কৰিছো। ই এটা ৰাজনৈতিক দল। ই এটা স্বীকৃতিপ্ৰাপ্ত আঞ্চলিক দল। আমি এই দলৰ সৈতে চামিল হৈছো। আদালতে সিদ্ধান্ত ল’ব কোনটো প্ৰকৃত তৃণমূল।’
যদিহে অধ্য়ক্ষ ওম বিৰলাই তৃণমূলৰ এই বিসম্বাদী সাংসদসকলৰ সিদ্ধান্ত মানি লয় তেন্তে মমতা বেনাৰ্জী নেতৃত্বাধীন তৃণমূল কংগ্ৰেছৰ বাবে এয়া হ’ব এক বৃহৎ ৰাজনৈতিক ক্ষতি।
উল্লেখ্য যে, ১৯৯৮ চনত কংগ্ৰেছ দলৰ পৰা আঁতৰি আহি মমতা বেনাৰ্জীয়ে গঠন কৰিছিল তৃণমূল কংগ্ৰেছ। এই দল গঠনৰ প্ৰায় তিনি দশকৰ পিছত এইধৰণৰ বৃহৎ ক্ষতি বুলি অভিহিত কৰা হৈছে।
