ফুটবলৰ ৰোমান্স শিখৰত। সেউজীয়া ঘাঁহনিত চলা ফুটবলৰ মহাযুদ্ধত এজনৰ পিছত আন এজন যোদ্ধাই দেখুৱাইছে পৰাক্ৰম। মেছী, কিলিয়ান এমবাপে, ক্ৰিষ্টিয়ানো ৰোনাল্ডো, হালাণ্ডৰ পিছত এইবাৰ চমক দেখুৱাইছে ইংলেণ্ডৰ ষ্টাৰ ফুটবলাৰ হেৰী কেনে। ৰাউণ্ড অফ ছিক্সটিনৰ গুৰুত্বপূৰ্ণ মেচৰ দ্বিতীয়াৰ্ধত হেৰী কেনৰ দুটা দুৰ্দান্ত গলৰ সহায়ত কংগোক ২-১ ব্যৱধানত পৰাস্ত কৰি অন্তিম ১৬ত প্ৰৱেশ কৰিলে ইংলেণ্ডে।
ইংলেণ্ডৰ হৈ সৰ্বাধিক গল প্ৰদান কৰা হেৰী কেনে মেচখনৰ অন্তিম ক্ষণ অৰ্থাত ৮৬ মিনিটত প্ৰদান কৰিছিল নিৰ্ণায়ক গলটো। ইয়াৰ পূৰ্বে ব্ৰায়ান ছিপেংগাৰ গলৰ সহায়ত হাফ টাইমলৈ আগবাঢ়ি আছিল কংগো। খেলৰ ৭৫ মিনিটলৈ পিছ পৰি আছিল ইংলেণ্ড। সকলোৱে ভাবিছিল বিশ্বকাপ ইতিহাসত সবাটোকৈ বৃহত অঘটনৰ সন্মুখীন হ’বলৈ আগবাঢ়ি আছে ইংলেণ্ড।
কিন্তু হেৰী কেনে মেচৰ ৭৫ মিনিটত এটা গল প্ৰদান কৰি মেচখনত সমতা স্থাপন কৰে। ইয়াৰ পূৰ্বে বিশ্বকাপ ইতিহাসত এটা গল হজম কৰাৰ পিছত এবাৰৰ বাবেহে বিজয়ৰ মুখ দেখিছিল ইংলেণ্ডে। সেইবাৰ আছিল ১৯৬৬ চনৰ বিশ্বকাপ ফাইনেল। পিছ পৰি থকাৰ পিছতো ইংলেণ্ড দলটোৱে তেতিয়াৰ পশ্চিম জাৰ্মানীক পৰাস্ত কৰি চেম্পিয়নৰ খিতাপ দখল কৰিছিল।
উল্লেখ্য যে, ইংলেণ্ডৰ হৈ ৮৪টা গল কৰা হেৰী কেনে চলিত বিশ্বকাপত এই পৰ্যন্ত দিছে পাঁচটা গল।
কেনে ভংগ কৰিলে পেলেৰ অভিলেখ
কংগোৰ বিৰুদ্ধে মেচখনত কেনে ভংগ কৰিলে ব্ৰাজিলৰ কিংবদন্তি তাৰকা পেলেৰ বিশ্বকাপত সৰ্বাধিক গলদাতাৰ অভিলেখ। প্ৰথমটো গলৰ সহায়ত কেনে পেলেৰ ১২টা গলৰ অভিলেখৰ সমতা স্থাপন কৰিছিল। কিন্তু মেচখনৰ অন্তিম সময়ত কেনে কংগোৰ ডিফেণ্ডাৰৰ কাষেৰে ড্ৰিবল কৰি গলৰক্ষক লিয়নেল ম্পাছিৰ কাষেৰে সোঁ ভৰিৰে শক্তিশালী শ্বট এটা মাৰি ইংলেণ্ডৰ হৈ ৮৪ সংখ্যক আন্তঃৰাষ্ট্ৰীয় গ’ল দিয়ে। এই গলৰ জৰিয়তে কেনে অতিক্ৰম কৰে পেলেক।
বিশ্বকাপত সৰ্বাধিক গলদাতাৰ তালিকা
১. লিঅ’নেল মেছী, আৰ্জেণ্টিনা- ১৯
২. কিলিয়ান এমবাপে, ফ্ৰান্স- ১৮
৩. মিৰোশ্লাভ ক্লজ, জাৰ্মানী- ১৬
৪. ৰোনাল্ডো, ব্ৰাজিল- ১৫
৫. গাৰ্ড মুলাৰ, জাৰ্মানী- ১৪
৬. জষ্ট ফোণ্টেন, ফ্ৰান্স- ১৩
৭. হেৰী কেন, ইংলেণ্ড- ১৩
৮. পেলে, ব্ৰাজিল- ১২
ইয়াৰ উপৰি এইবাৰৰ বিশ্বকাপত সৰ্বাধিক গলদাতাৰ তালিকাত হেৰী কেন নৰৱেৰ আৰ্লিং হালাণ্ডৰ সৈতে যৌথভাৱে আছে তৃতীয় স্থানত। সৰ্বাধিক গলদাতাৰ তালিকাৰ শীৰ্ষত লিঅ’নেল মেছী আৰু দ্বিতীয় স্থানত আছে ফ্ৰান্সৰ কিলিয়ান এমবাপে।
উল্লেখ্য যে, এইবাৰ ৰাউণ্ড অফ ছিক্সটিনত ১৯৬৬ চনৰ চেম্পিয়ন ইংলেণ্ডৰ সন্মুখত সহ আয়োজক মেক্সিকো। চলিত বিশ্বকাপত দুৰ্দান্ত প্ৰদৰ্শন আগবঢ়োৱা মেক্সিকোৱে ইংলেণ্ডক যথেষ্ট প্ৰত্যাহ্বান জনোৱাৰ সম্ভাৱনা আছে।
