আজি অসম আৰক্ষীয়ে গুৱাহাটীৰ পৰা ককৰোচ্চ জনতা পাৰ্টি চমুকৈ CJPৰ সহ-প্ৰতিষ্ঠাপক আশুতোষ ৰাংকাকে ধৰি কেইবাজনো কৰ্মীক আটক কৰিছে। আৰক্ষীৰ এই কাৰ্যত ক্ষুন্ন হৈ CJPৰ প্ৰতিষ্ঠাপক অভিজিৎ দীপকেই এক নতুন বিবৃতিৰ জৰিয়তে সোমবাৰে তেওঁ অসমলৈ আহিব বুলি উল্লেখ কৰে।
দীপকেই সামাজিক মাধ্যম এক্সযোগে এটা পোষ্টত লিখিছে, ‘আশুক এতিয়াও আৰক্ষীয়ে মুকলি কৰি দিয়া নাই বাবে মই কাইলৈ পুৱা অসমলৈ যাম। গ্ৰেপ্তাৰ বা জেলৰ ভাবুকিয়ে আমাক ভয় খুৱাব নোৱাৰিব। ইচ্ছা কৰিলে কাইলৈ মোক বিমানবন্দৰৰ পৰা গ্ৰেপ্তাৰ কৰিব পাৰিব।’
উল্লেখ্য যে, দেওবাৰে CJPৰ সহ-প্ৰতিষ্ঠাপক ৰাংকা আৰু তেওঁৰ সহযোগীক আৰক্ষীয়ে আটক কৰে। ৰাংকাই অসমত বিদ্যালয়ৰ অৱস্থা আৰু ভোটাৰ তালিকাৰ সৈতে জড়িত SIR সন্দৰ্ভত এক বিশেষ কাৰ্যসূচী চলাই আছে।
ইফালে ৰাংকাক আটক কৰাৰ পিছতে CJP নেতাগৰাকীয়ে অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে গুৰুতৰ অভিযোগ উত্থাপন কৰে। তেওঁ উল্লেখ কৰে যে যদিহে CJPয়ে অসমৰ বিদ্যালয়ৰ বাস্তৱতা উদঙাই দিয়ে তেন্তে দেশজুৰি সত্য প্ৰকাশ পাব। কাজিৰঙা সন্দৰ্ভতো চৰকাৰক লক্ষ্য কৰি লয়। তেওঁ উল্লেখ কৰে যে স্থানীয় লোকৰ অধিকাৰ কাঢ়ি লোৱা হৈছে আৰু মাটি, বনাঞ্চল, পানী কৰ্পৰেট কোম্পানীক গতাই দিয়া হৈছে।
