জেনেৰেল এন এছ ৰাজা সুব্ৰমণিয়ে ৩১ মে’ অৰ্থাত দেওবাৰে দেশৰ তৃতীয় চীফ অৱ ডিফেন্স ষ্টাফ হিচাপে দায়িত্ব গ্ৰহণ কৰে। কাৰ্যভাৰ গ্ৰহণ কৰাৰ লগে লগে তেওঁক চাউথ ব্লকত আনুষ্ঠানিকভাৱে গাৰ্ড অৱ অনাৰ দিয়া হয়। ৩০ মে’ত অৱসৰ গ্ৰহণ কৰা জেনেৰেল অনিল চৌহানৰ উত্তৰাধিকাৰী হিচাপে দায়িত্ব লয় গড়ৱাল ৰেজিমেণ্টৰ জ্যেষ্ঠ বিষয়া ৰাজা সুব্ৰমণিয়ে। দায়িত্ব গ্ৰহণ কৰিয়েই জেনেৰেল সুব্ৰমণিয়ে স্পষ্ট কৰি দিয়ে যে তেওঁৰ নেতৃত্বত ভাৰতীয় সশস্ত্ৰ বাহিনীৰ প্ৰধান গুৰুত্ব হ’ব ‘JAI’ (জয়) অৰ্থাৎ সমন্বয়, আত্মনিৰ্ভৰশীলতা আৰু উদ্ভাৱন।
কঠিন পৰিস্থিতিত অসাধাৰণ কাম
৪০ বছৰতকৈও অধিক সময়ৰ বৰ্ণিল কেৰিয়াৰত লেফটেনেণ্ট জেনেৰেল এন এছ ৰাজা সুব্ৰমণিয়ে বিভিন্ন সংঘাতপূৰ্ণ অঞ্চল আৰু ভৌগোলিক পৰিস্থিতিত সেৱা আগবঢ়াই অহাৰ লগতে বিভিন্ন কমাণ্ড, ষ্টাফ, আৰু প্ৰশিক্ষণৰ দায়িত্বও পালন কৰি আহিছে।
সংযুক্ত মুক্তি বাহিনী অসম চমুকৈ আলফাৰ বিৰুদ্ধে চলা অপাৰেচন ৰাইনোৰ সময়ত সুব্ৰমণিয়ে ১৬ গড়ৱাল ৰাইফলছক কমাণ্ড কৰিছিল। তেওঁ জম্মু-কাশ্মীৰৰ ১৬৮ ইনফেণ্ট্ৰি ব্ৰিগেড তথা প্ৰত্যাহ্বানমূলক পৰিস্থিতিত কেন্দ্ৰীয় ছেক্টৰত ১৭ মাউণ্টেন ডিভিজনৰো কমাণ্ডাৰ আছিল। পশ্চিম ফ্ৰণ্টত নিয়োজিত ভাৰতীয় সেনাৰ মুখ্য ষ্ট্ৰাইক কৰ্পছ ‘II কৰ্পছ’ৰ কমাণ্ডাৰ হিচাপেও কাৰ্যনিৰ্বাহ কৰাৰ অভিজ্ঞতা আছে সুব্ৰমণিৰ।
৪০ বছৰৰ এক বৰ্ণিলময় কেৰিয়াৰ
৪০ বছৰতকৈও অধিক সময়ৰ কেৰিয়াৰত জেনেৰেল সুব্ৰমণিয়ে বিভিন্ন সংঘাতপূৰ্ণ অঞ্চল আৰু ভৌগোলিক পৰিস্থিতিত সেৱা আগবঢ়াইছে।
জেনেৰেল সুব্ৰমণিয়ে ২০২৪ চনৰ ১ জুলাইৰ পৰা ২০২৫ চনৰ ৩১ জুলাইলৈকে সেনা বাহিনীৰ উপ-প্ৰধান হিচাপে কাৰ্যনিৰ্বাহ কৰিছিল।
২০২৩ চনৰ মাৰ্চ মাহৰ পৰা ২০২৪ চনৰ জুনলৈকে কেন্দ্ৰীয় কমাণ্ডৰ জেনেৰেল অফিচাৰ কমাণ্ডিং-ইন-চিফ হিচাপে কাৰ্যনিৰ্বাহ কৰিছিল।
তেওঁ ৰাষ্ট্ৰীয় প্ৰতিৰক্ষা একাডেমী আৰু ভাৰতীয় সামৰিক একাডেমীৰ স্নাতক।
জেনেৰেল সুব্ৰমণিয়ে ১৯৮৫ চনৰ ১৪ ডিচেম্বৰত গড়ৱাল ৰাইফলছৰ ৮ নং বেটেলিয়নত নিযুক্তি লাভ কৰিছিল।
জেনেৰেল সুব্ৰমণিৰ কৰ্মচাৰী আৰু প্ৰশিক্ষণ নিযুক্তিৰ ভিতৰত আছে মাউণ্টেইন ব্ৰিগেডৰ ব্ৰিগেড মেজৰ, কাজাখস্তানত ডিফেন্স এটেচে, সামৰিক সচিব শাখাৰ সহকাৰী সামৰিক সচিব, জম্মু-কাশ্মীৰৰ ৰাষ্ট্ৰীয় ৰাইফলছ খণ্ডৰ উপ-সেনাধ্যক্ষ, আৰু প্ৰতিৰক্ষা মন্ত্ৰালয়ৰ (আৰ্মি) সংহত মুখ্য কাৰ্যালয়ত সামৰিক চোৰাংচোৱাৰ উপ-সঞ্চালক প্ৰধান।
জেনেৰেল সুব্ৰমণিয়ে তেওঁৰ বিশিষ্ট সেৱাৰ বাবে পৰম বিশিষ্ট সেৱা পদক, অতি বিশিষ্ট সেৱা পদক, সেনা পদক আৰু বিশিষ্ট সেৱা পদক লাভ কৰিছে।
